شێعری کوردی جوانترین شێوازە بۆم
ئەم زمانە چاکترین ڕێبازە بۆم

بیری ڕابردوو کە سەرخۆشم دەکا
سەد شوکر، ئێستا وەکوو هاوڕازە بۆم

ماڵی دونیام گەر نییە قەیدی نییە
دەرکی دەروازەی قەناعەت بازە بۆم

بولبولی هەستم کە دی دیمەن بەهار
هەر خەریکی خوێندنی ئاوازە بۆم

چەپڵەڕێزانی کچانی جوانی کورد
خۆشترین ئاهەنگ و دەنگی سازە بۆم

ڕۆیشتووم سەد جار بەرەو مەڵبەندی یار
ڕێگەکەی هەم لێژە هەم هەورازە بۆم

من وەکوو سێبەر بەدووی یارا ئەچم
ئەو کەچی کاری هەموو هەر نازە بۆم

خۆشە پێم دوژمن لەگەڵما بێتە شەڕ
شێعرەکانم ( ڕەوشەنا) سەربازە بۆم

ناسر ڕەوشەن

خۆزگە مومکین با، لە خەڵوەتدا، من و تۆ دوو بە دوو
خانە خاڵی بێ لە غەیر و دابنیشین ڕوو بە ڕوو

شەرحی ئەییامی جودایی و دەردی خۆم بۆ تۆ بکەم
هەر لە ڕۆژێکا کە لێت ئاوارە بووم، موو بە موو

زوڵفی موشکینت پەرێشان کە بەسەر شان و ملت
وەک حیکایاتی پەرێشانیم بوەستێ موو بە موو

چارەیی دەردم بە ئەنفاسی مەسیح قەت ناکرێ
من شیفام نایە مەگەر ئیمشەو لە دەستی تۆ بە توو

دەردی ئیشقە هێندە تەئسیری لە گیانم کردووە
وەعدەیی فەوتانمە چارەم نەکەی گەر زوو بە زوو

من لە نەززارەی نیگاهت تۆ لە خوێنی جەرگی من
تا بخۆین لەم بادەیە بۆ عەیشی تەنها دوو بە دوو

هەروەکوو بولبول لە گوڵشەن (خادیم) ئیمشەو نەغمەگۆ
ناڵەیی جان سۆزی ئەڕوا کوو بە کوو و سوو بە سوو

#خادیم

نەسرین گوڵی نەسرینە
چووزەرەی یاسەمینە
خنجیلە و خوێن شیرینە
دەمی بە پێکەنینە
کەیفی لە هەڵپەڕینە
شنەشنی بیبینە

نەسرین گوڵی بەهارە
لێو ئاڵە چاو بەخومارە
لەناو كچانا دیارە (بیشتر…)